الطريقه :
1- يرب الزبد جيدا حتي تسيح
ثم يوضع الدقيق علي الزبد ويراعي نخله (عشان يدخله الهوا والسمبوسك ميكونش مكتم )
ونقلب جيدا حتي يمتزج الدقيق بالزبد
ثم نضع الملح والسكر واللبن ونراعي مع وضع اللبن ان يكون علي مرات وحسب احتياج العجين
لان ممكن الدقيق لا يحتاج كمية اللبن كلها
ثم تعجن جيدا حتي تصبح العجين قطعه واحده
ثم تكور العجينه كور صغيره
وتفرد كل كره بحيث تكون رقيقه ونضع في منتصفها الحشو
وتقفل بطريقه معينه : تثني الاطراف علي بعضها
ونيجي من الحرف ونلف الاطراف علي بعضها كما هو موضح بالصور ونراعي احكام الغلق عشان متتفتحش اثناء القلي
كده جاهز علي القلي في الزيت زي القطايف بالظبط
بس ناخد بالنا انها بتتحمر بسرعه جدا
مش بتاخد وقت علي
وعشان نتاكد من نجاح السمبوسك هنلاقيها فارغه من جوه
يعني عاليه ومش لازقه في بعضها
بعد كده نرش عليها سكر ناعم
وبالهنا والشفا
ياريت تجربوا وتقولولي رايكم
.jpg)
Atom Feed (xml)
هناك 10 تعليقات:
شكلهاالنهائى لذيذ وطريقتها حلوة وسهله وبسيطه
بس دة مش سمبوسك خالص
السمبوسك اللى اعرفه عجينه جاهزة .. دة اولا
الخطوات كالتالى
-تجيبى العجينه من اولاد رجب
- تحشيها حاجه من التلاته دول
لحمه مفرومه
او جبنه
او بيض بالمايونيز
التلاته حادق يعنى
انما مكسرات وسكر وتقوليلى سمبوسك !!!!!
انتو كدة يا هتنسونا الاكل يا هتنسونا الاسامى
وكمان شكلها مش كدة .. هه .. بقى
مممممممم
مممم
هروح اسأل حد بيفهم لحسن اكون اتلخبطت ..
محدش يضرب
مستكه رائعه جدا"
وعلى فكرة هى طريقه غير طريقة السمبوسك اللى بنعملها بالعجينه الجاهزه أو بالجلاش
يعنى وائل عنده حق
وعلى فكرة يا وائل انا زعلانه منك بجد بجد...نسيت أمك ماشى يا استاذ
نرجع للسمبوسك
يعنى ممكن نعمل سمبوسك بالجلاش ونفطعه شرائح طوليه ونحشيه زى الجاهزه بالظبط
بس الحقيقه الطريقه دى بشوفها فى منتديات العربيه والمتخصصه فى الأكل
وبيحشوها حادق علشان اظنها لو حلو هتحتاج عسل؟؟
لا مش بتحتاج ؟
على كل هجربها إن شاء الله وهاقولك على النتيجه
تسلم إيدك بجد
السلام عليكم ورحمة الله وبركاته
اهلا بيك يا هندسه
والله بفكر اعملك عرض خاص
كل اكله نعملها لك طبق خاص منها
دا يكفي التشجيع والله
بص هقولك بئه بالنسبه للسمبوسك بتاعي
هو مش السمبوسك المتعارف عليه
اللي انت قلته ده
لا ده اتجاه تاني خالص بس انا مش عارفه له اسم فبقول عليه سمبوسك عرفت بئه الاختلاف جه منين
انا عارفه السمبوسك الحادق اللي تقصده وبعمله بس هو غير ده خالص
وبالنسبه للمسميات لاتقلق خالص انا هنسيكم اسامي كل الاكل
طيب سيبك انت من كل المسميات جرب تدوقه وقلي رايك
عديها بئه
ام البنااااات
فينك يا جميل تقلانه علينا ليه بس
مش هتكلم عشان احنا في رمضان بس غير كده لامونكن ابدا
نورتيني والله
بصي هو ده مش سمبوسك المتعارف عليه ده نوع من الحلويات بدل القطايف السمبوسك المثلثات اللي بتقصديه سواء بعجينه جاهزة او جولاش انا بعمله بيكون جميل اوي بحشيه لحمة مفرومه او خضار وله كذا طريقه
حتي اخوانا في الخليج بيسموه بورء
انما ده مش هو خالص مالص
اعتبروها نوع من الحلوي ملهاش اسم وسميناها كده تجاوزا
اشطه ؟ ههههههههههههه
بس بجد طعمها جميل اوي هستني رايك ان شاء الله
بالنسبه بئه للبشمهندس وائل انا بحب اهدي النفووووس جداااا
بس الدنيا رمضان ومش هينفع اهدي النفوس دلوقتي
مستكتي انا جيت
والله الفكرة حلوة اوي يا مستكة هجربها هو انا وراي ايه
وعلى فكرة اهي تنفع برده اني اعملها زي السبموسك اصلي مش لاقية عجينة السمبوسك هنا او بمعني اصح مش عارفة اسمها
هجرب واقولك ان شاء الله طلعت ازاي بس مش هقدر اصور بلاش فضايح
هنزل اخر افتكساتي ان شاء الله قريب على المدونة بتاعتي اللي حاسة انها حمضت من اول رمضان ما عملتش فيها حاجة
ربنا يسير وألحق اعمل حاجة اليومين دول
رمضان كريم يا مستوكة
نيفرتيتييييي
فينك يا بنتي دا انا كنت هنزل انادي عليكي في ميكرفونات البرازيل
نفرتيتي تايهه يا ولاد الحلال
الحمد لله انك بخير
بصي العجينه دي مينفعش تعملي بيها السمبوسك التاني عشان لينه عن العجينه التانيه
لو عندك جولاش اعملي بيه افضل
شدي حيلك في المزكرات شويه مينفعش كده منتظرينك
اهلا وسهلا بحضرتك
مش عارفه اقول حضرتَك ولا حضرتِك
انا كنت قريت نفس المشاركه في مدونة كلام هشام
ان شاء الله اقرا مقالاتك قريبا
مستكة عملت السبموسك الحلو بتاعك اللي شبه القطايف
بجد طلع لذيذ جدا تسلم ايدك
هجرب احشية جبنة
لو عندك طريقة عجينة السبموسك بتاع اللحمة المفرومة قولي لي عليها
اصل اختراع الجلاش لسة ما جاش
هههههههههههههه
بشمهندس وائل
لا انت كده بتفهم جدا كمان
السبموسه اللى مرت عليا نفس السمبوسه اللى مرت عليك بالظبط ..
وش بيبص لفوووق
بس تصدقي يا مستكه
شكله تحفه والله
هجرب اعملها بس مش حلوة
ماليش بقى فى الحلو
ماحطش سكر واغير الحشو من جوة ..
اخيه حاجه من التلاته اياهم
هتبقى تحفه بردو
طب جربي كده وقوليلي ..
وش شرير
تعرفي يا رضوي فطيرة الابل باي
اللي شكل الساندويتش تلاقيها في ماكدونالز وبعض المطاعم التانيه
ممكن تعملي احسن منها مليون مره بنفس العجينه دي
بس احشيها تفاح
طريقته كالتالي :
هاتي التفاع وقشريه وقطعيه مكعبات صغيره
وجيبي معلقة زبده في في طاسه علي النار وحطي فيها التفاح وحطي عليه سكر وقرفه واول ماتحسي التفاح استوي احشي العجينه دي بيه
هتديكي نتيجه تحفه
وسيبك من نظام الحوادق ده وادعيلي
^_^
إرسال تعليق