الأحد، 1 مارس 2009

مارس وأنا


الجميل في شهر مارس انه بينتهي فيه الشتا , وبيكون فيه عيد الام , امممم والاجمل والاهم انه بيبتدي بيوم ميلادي (3\3)تاريخ موسيقي ياناس .


من اهم مواليد اليوم ده واللي بحترمه جدا هو الفنان محمد صبحي .. وبالبحث عن حدث في مثل هذا اليوم كانت النتيجه :




سنة 940 - مولد عالم الرياضيات العربي أبو الوفا البوزجاتيسنة 1847 - مولد مخترع التليفون جراهام بلسنة 1853 - مولد الرسام الهولندي فان جوخسنة 1924 - خلع السلطان العثماني عبد الحميد آخر السلاطين العثمانيينسنة 1956 - صدور قانون الانتخاب ومنح المرأة حق الانتخاب لأول مرة في مصرسنة 1961 - تنصيب الحسن الثاني رسميًّا ملكًا على عرش المغرب .




ياااه يوم 3\3 مش يوم عادي خالص ..


كل سنه في اليوم ده افكر كنت فين ووصلت لفين حققت ايه وفشلت في ايه احيانا النتيجه بتكون جميله وكتير بتكون


العكس لدرجة اني في السنين الاخيره بئيت اكتئب من شهر مارس اللي بيجي بسرعه اوي كل سنه بس اللي بيهون كتير


عليا حالة الكأبه دي اخواتي واصحابي اللي بيفتكروني كلهم في اليوم ده ومش بلاحق هدايا تلفونات وزيارات وكلمات معايده ..


اجمل احساس في الدنيا انك متحسش بالوحده وتحس بحب كل اللي حواليك نعمة جميله ربنا ما يحرمنا منها اللهم امين


صحيح الافكار مش بتسيب حد في حاله وكل سنه لازم تاخد حقها في السنتين اللي قبل كده كتبت احساسي في اليوم ده


حابه اكتبهم هنا عشان السنه الجايه ان شاء الله ابص علي البوست ده واقراه واشوفني كنت بفكر ازاي ...





2007


زمان وانا صغير


زمان وانا صغير كنت بحلم ابقي كبير ............. كبر القلب واتحير مالدنيا والمشاوير ....قلت يا ريتني فضلت صغير


لما سمعت المقطع ده من الاغنيه سرحت مع نفسي وافتكرتني وانا صغيره افتكرت حاجات دورت عليها دلوقتي


ملقتهاش ... اد ايه ادايقت .... ليه كل ما نكبر يضيع مننا حاجه دورت في الوجوه لقيتها اتغيرت .... فيه اللي كرمش ...


ومنها اللي كشر ... ومنها الحزين ... وفيها اللي معرفتوش دورت في الشوارع لقتني تهت ...... فين البيوت ؟؟؟؟؟


اتغيرت سألت حيطانها ..... منها الجديد ميعرفنيش ومنها اللي الزمن هده .... مفتكرنيش ومنها اللي قالي عيشي يا بنتي


ومتساليش فين الشارع الكبير لما كنت صغيره .....لسه فاكره فيه جريت ولعبت ....... أووله ...نط حبل ... عجل ...


وكورة ,اه وقعت ... واتجرحت بس ضحكت .... كان ضحك جميل من القلب ..



فين صحابي ؟؟؟فين جيراني ؟؟؟ فين هند ومحمد واحمد وسالي ؟؟؟اللي سافر واللي نقل واللي معرفش عنه حاجه واللي


انتقل حتي اللي لقيته معرفتوش رسم الزمن علي وشه رتوش .... من الايام والسنين اللي عدت شايله وياها الالام والحنين


ومسؤليه تهد اتخن تخين حاولت الاقي حاجه واحده متغيرتش لقيتني ببحث عن مستحيل ...... قلبي اتوجع فضلت ألملم


ذكرياتي ...... وارجع اواجه حياتي ... وانا بقول لنفسي : يا ريتك ما كبرتي



2008
انا ومارس

هييييييييييييييه دنيا

سبحان الله الشهور دي بتجري ورا بعضها بسرعه اوي
الواحد لسه ملحئش يستوعب ان 2007 جت ألاقي 2008 بتزؤها وتدخل
لا وإيه شهر تلاته ده في اول السنه كده خبط رزع يعني لامفر اتحسبت السنه وبصمت بالعشره
الا هو الواحد مينفعش يقف علي كده بئه !!
حاسه ان السنه التلاتين وقفه في الطابور بتزؤ كل اللي اودامها عشان يصيبها الدور
الدور الدور موعوده ياللي عليكي الدور لا مؤاخذه يا شااااابه
ولا بلاش السيره دي لما تبئي تيجي التلاتين اوعدكم بموضوع نكد إنما ايه وصايا وصايا يعني( ماليش بركه غيركم )
وبصرف النظر يعني ان شهر مارس في اول السنه وانه في الكام سنه الاخيره اصبح مصدر قلق وعكننه ليا لانه كل شويه بيفكرني بالذي مضي ( دا علي اساس اني ناسيه يعني )
الا اني سبحان الله , لله في لله كده بحبه مش عارفه ليه يمكن عشان الناس بتفتكرني في اليوم ده وهدايا وبتاع وانا طول السنه محدش معبرني اساسا ياهل ترى
او يمكن عشان بيبتدي فيه الربيع وبخلص من كابة الشتا !!
او يمكن لانه شهر العظماء
مش عارفه . بس اللي انا متاكده منه انه مش بعيد كمان سنتين ألغيه من شهور السنه كولها
فييييين من اول مارس شرفت فيه للدنيا مش عارفه معملوش اليوم ده عيد قومي ليه دي مش اي مناسبه ياناس
اكيد يوم ما تميت اول سنه ليا ماما وبابا كانو فرحانين وهيطيرو من الفرحه واكيد جالي هدايا كتييييييير طبعا ماهي اول سنه بئه
( ومش هحاول افتكر اني تالت اخواتي يعني ماما وبابا زهئو عيال ومش بعيد كانو بيفكرو يسلفوني للجيران , وكمان هتناسي ان اخواتي الاكبر مني اكيد اخدو كل الهدايا ولعبو بيها وانا لا شفت ابيض ولا اسود
بس يمكن افتكر خامس مارس عملنا فيه حفله كبييييره عملت فيه ماما اعياد ميلادنا كلنا في اليوم ده ايه الحكمه مش عارفه بس يظهر كان فيه علاوة ولا حاجه قالت اما تضمن بابا
وكان اخي الصغير شرف ووقتها معدتش انا الصغيره وطبعا عليا انا التحمل اه ماهو الصغير بئه لا وايييييه اخر العنقود ( يعني ياربي مش كفايه اني اول السنه واكبر من صحباتي بشهور لا وكمان الوسطنيه
وطبعا هو اللي طفي الشمع يومها ولن انسي له هذا الموقف
تاسع مارس بئه بصراحه ده اللي مش هنساه ابدا ماما عملتلي حفله لوحدي وزينه وبلالين وهدايا أحمدك يارب
وجبت اصحابي وقلبنا البيت يومها واجمل حاجه بابا جابلي فيلم مخصوص عشان يصورني ويومها اعدت اتحكم مين اللي يتصور ومين لا بعيد عنكم السلطة وحشه بتغير في النفوس , هو صحيح يعني من يومها وبابا بيطلع في الفيلم بس انا لسه عندي امل ان الفيلم يطلع في يوم من الايام هه يا مسهل
وتكرررررررر الايام
لا لا الايام زمان مكنتش بتكر كانت بطيئه اوي دا انا كنت بدعي ربنا اكبر سنتين في سنه
وافتكر بالخير ايام ثانوي فعلا كانت من اجمل الايام كان تلات ارباع المدرسه صديقاتي شوفو انتو بئه صحيح يعني الهدايا كانت كلها دباديب وصحيح كلها نفس الشكل واللون
بس كنت فعلا بفرح اوي باليوم ده اللي بستناه من السنه للسنه واقول امتي بئه اوصل للعشرين
وافتكر في اليوم اللي تميت فيه عشرين سنه يااااه كان ناقص اجيب زفه وامشي اغني وجبت العشرين ياحلولي جبت العشرين ياحلاوة
كنت في أوج فرحتي (حلوة أوج دي لزوم الثقافه الجامعيه وكده وبتاع )يا
سلام كنت دايما فرحانه ومقبله علي الحياه وشايفاها وردييييييي( علي ايه معرفش )ومررررررررررررررت الايام
جبت الواحد وعشرين
والاتنين وعشرين
0
0
0
0
الي اليوم
وااااااااااادي مارس جديد بيضيف رقم جديد شايل معاه شوية خبرات علي
تجارب علي بعض حسنات علي كتير سيئات و صداقات جديده وحبة زكريات
والحسابه بتحسب
وياعالم مارس الجاي هكون ايه ولا فين ولا ليه !
وعلي راي الحكيم اللي معرفوش :
عام مضي .. عام ات
هكذا الدنيا حتي الممات


2009


السنه دي مش هقول غير ..

الحمد لله علي نعمة الاهل

الحمد لله علي نعمة الاصحاب

الحمد لله علي نعمة الصحه

الحمد لله علي نعمه التي لاتعد ولا تحصي

امنيتي السنه دي ربنا يرضي عني ويرضيني

وكل سنه وانا طيبه

هناك 16 تعليقًا:

الفقيرة إلى الله أم البنات يقول...

اول مهنئ على المدونات
كل سنه وانت طيبه يا حبيبة قلب ام البنات
يارب السنه الجايه امخانيك كلها متحقق
يارب يسعد ربى أيامك يا احلاى واجمل وانقى مستكه

كل الدعوات وكل الامانى الجميله ليك يا حبيبة قلبى


هيجى وائل يعيد عليك ويطلب منك متحطيش وطفات الشهر ده احتفالا بعيد ميلادك

ghorBty يقول...

السلام عليكم

كل عام وانت من الله اقرب وعلي طاعته ادوم

ربنا يعود عليك الايام بالخير والبركه ويرزقك كل ما تتمني وزياده

بوست هائل بما فيه من ذكريات

دمت بخير وسعاده

غربتي

salma mohamed يقول...

كل سنة وانتِ طيبة,
احنا في تشابه بينا في كذا حاجة,
انا برضه ثالث اخواتي,واللي بعدي اخر العنقود,وكانت المدرسة كلها مصحباني زيك تمام,
بس خلاص كبرت واتخرجت والعمر بيجري والشهر الجاي هبقى 23 سنه,
كل سنة وانتي في صحة وهنا وعقبال الف سنه(:

مستكه يقول...

ام البنات انتي ملكيش حل

والله اجمل مفاجئه واجمل هديه

ربنا مايحرمني منك ابدا

تخيلي اقفل المدونه بليل علي شكل افتحها تاني يوم بشكل تاني خالص للاجمل طبعا

والله ما انا عارفه اقولك ايه مفاجئه واحلي مافيها اني مش متوقعاها خالص

وكمان جبتيلي الريدر بالصور وانا كان نفسي في الحركه دي

ربنا يخليكي يارب ويسعد قلبك زي ما اسعدتيني

بوسه كبيييييييييييييييره وحضن لاجمل ام البنات في الدنيا

ام البنات بجد اللي حاساه اكبر بكتير من كل الكلام اتمني يكون واصلك

علي فكره كنت ناويه انزل بوست عيد ميلادي اكله انا بحبها اوي بس قلت لا بلاش نخليها زكريات المره دي

لكن لو مصممه وعشان خاطر بشمهندس وائل مخصوص ننزل بالاكلات طول الشهر ملناش بركه غيركم

وش شرييييييييير ومفتري

مستكه يقول...

غربه

ربنا يديم عليكي السعاده والرضا يارب

وربنا يسعد قلبك زي ما اسعدتيني بمرورك الرائع ده

ربنا يتقبل الدعاء يارب

نورتيني بزيارتك الجميله

مستكه يقول...

سلمي

هتصدقيني لو قلتلك اني بحسك اختي الصغيره !

علي الرغم اني مش اعرفك شخصيا بس سبحان الله حاسه اني عارفاكي

ويسعدني ان يكون بيني وبين شخصيه جميله زيك كده تشابه

ربنا يبارك في عمرك يا حبيبه وعشان كده هنصحك واقولك متغلطيش غلطتي وتسيبي السنين تجري منك من غير ماتحسي بيها

استغلي ايامك صح عشان متندميش علي يوم فات منك

ربنا يسعدك ويرضيكي يارب

لجين أبو الدهب يقول...

مستكة حبيبة قلبى ..

كل عام وانت لربك طائعة ..

لنبيك تابعة ..

فى الجنة طامعة ..

كل سنة وانتى طيبة يااحلى مستكة فى الدنيا ..

ويجعل عمرك كله سعادة وهنا وسرور والسنة الجاية تيجى عليكى ان شاء الله وانتى محققة كل امنياتك ..

ودايما مطبخك فى ازدهار ..

( مع انى كنت منتظرة الاكلة علشان ناكل حاجة حلوة اليوم D:

ويومك موسيقة فعلا ده تلاقيه سنة 2003 كان الملحنين بيعزفوه ..

3-3-2003 تررن تررن تررن ..

ربنا يكرمك يامستكة ويبارك فيكى ربنا يعلم انا بحبك فى الله اد ايه وبحب طيبتك ربنا يدمها عليكى نعمة ..

ومبروك على المدونة ..

وكل سنة وانتى طيبة مرة تانية (F) >>

دمتِ بخير ..

وائل مصطفى يقول...

ايه الحرفنه دى

بوست مكتوب بأقتدار والله واستمعت بقرائته جدا وناوى اعمل زى حضرتك كدة ان شاء الله واشوف كتبت ايه كل سنه وايه اتغير .. ربنا يدينا ويديكى طول العمر والعمل الصالح يارب

كل عام وانتى بكل خير وصحه وسعادة يارب

يوم مميز طبعا

وعقبال 3\3 \ 2300

انا مفكرتش ادور على اللى حصل يوم عيد ميلادى اللى هو 8\8 \78

او حتى يوم 8\8 بس

بس اعتقد كله هيبقى احداث مبهجه جداااا

مش تقوليلى خلع السلطان وحريق القاهرة وحق الانتخاب

ههههههههههههه

وائل مصطفى يقول...

ثانيا مبروك الشكل الجديد المتميز للمدونه .. احلى بكتير من الاول

بس هى طنط ام البنات اللى عملتها لحضرتك ؟؟؟

كدة يا طنط ؟؟ وسايبه مدونتى بفنجان النسكافيه لغايه ما بقى اكسبيرد ؟؟

طب استنى عيد ميلادى بقى ولا ايه انا كمان

وش مقهور

وائل مصطفى يقول...

واخيرا

عندك حق يا امى طبعا .. مستكه المفروض تراعى دة نزولا على رغمة الجماهير

يعنى فى هذه المناسبة السعيدة بقى ميصحش خالص نلاقى الشهر دة اى افتكاسات من نوعيه فليبينيه فى الاراضى المصريه ولا سمبوكسات فى الحبشتكنات ولا كيكات مضروبات ولا تعذيب للكونافات .. يعنى قضيها مشويات وفقط

ياريت يعنى .. رجاء خاص

احنا هنقضيها دليفرى متشغليش بالك

(:

الفقيرة إلى الله أم البنات يقول...

ست البنات مستكه
الحمد لله ان المفاجأة عاجبتك
بس بجد اتخضيتى ؟وقلتى دخلت مدونة مش بتعتى؟
بس افرحى بيها كام يوم ..وبعدين اعمل لك واحده مختلفه
المدونة دى شكل مدونة واحده حبيبتى بحبها قوى..ولقيت انها انسب ليك
بس شويه كده واعملك واحده مفتكسه ليك لوحدك ياجميل
************
وائل يعنى مفيش فايده فى الشغب إللى بتعمله
انت عاوز تغير مدونتك
ابعتى لى الايمل والباسورد على الياهو وان شاء الله مش لازم عيد ميلادك
بس الشرط نور متعبش نفسى واموت روحى واظبها وفى الآخر تسيب التراب فى كل مكان وتركنها
وبالنوسبه يعنى انها عاجبتك الحمد لله
اصلى حبيت اعملها مفجأة للاخت مستكه هانم مطلعه عينى بقى لها اكتر من 5 شهور عاوزة تغير شكل المدونة
فقررت اخد المبادرة واعمل لها المدونه
وبعدين ممكن تغيرها بعد شويه بس أهم شئ انها عاجبتها هى صاحبة الفرح
وبما إنك عينك فيها
ماشى ياعم المهندزين كلهم اعملك واحدة
بس انت تأمر
ووالله يا وائل توصى مستكه فى اى تعليق تعلق عليه بلاش افتكاسات

وحشتونى ياولاد المؤمنين

مستكه يقول...

لوجين حبيبتي

ربنا يعزك ويكرمك يارب

كل سنه وانتي طيبه ياجميل

ايه رايك في التاريخ الموسيقي ده

لا وكمان بنت اختي تاريخ ميلادها 22-2-2002 واخوها 4-4-2004

يعني من الاخر كده كلنا عيله موسيقيه

فرقة حسب الله ^_^

لوجي والله انتي اللي جميله وطيبه ربنا يسعدك يارب ويارب عقبال ما نهنيكي بلوجين الصغيره او ابو الدهب الصغير


ورده - ورده - ورده

مستكه يقول...

بشمهندس وائل كل سنه وحضرتك طيب

بجد البوست عجبك !

دا انا قلت الناس بترد مجامله لان البوست طويل وكله لوك لوك وملل حتي مرضتش اكتب محاسيسي في مثل هذا اليوم من السنه دي رأفتا بيكم الصراحه ^_^

متعوضه السنه الجايه ان عشنا وكان لينا عمر ان شاء الله

بالنسبه لعقبال 2300 كده مش بتبارك لمستكه انت بتبارك لديناصور منقرض من العصر الجوراسبي


بالنسبه للاكل فانا وراكم وراكم لحد ما تبطلوا تاكلو خالص ^_^

فيه ازمه اقتصاديه في العالم لازم نراعي الشعوب الاخري


علي فكره مدونتة حضرتك جميله فعلا بس عايزه اهتمام خساره تسيبها كده .

مستكه يقول...

طنط المدونه عجبتني جداااااا

اصلا انا بموت في المفاجات وخصوصا لما تكون حاجه مش متوقعه خالص

ربنا يخليكي ليا يااااااااارب معلش لو هكون طماعه هو بس فيه شوية اضافات كنت عايزه اضيفها بس طبعا في اي وقت تكوني فاضيه فيه انا مش مستعجله

معلش بئه انتي عارفه انا في الامور دي كفته ^_^

وبعدين افتكاسات ايه دا انا غلباااااانه مش باين عليا ولا ايه ^_^

كمان انتي وحشتينا والله

اه طنط لو جددتي المدونه لبشمهندس وائل ومش شغلها تعالي نعمل عليها هاكر بس ده سر بينا بئه

^_^

راندا رأفت يقول...

كل سنة وانت طيبة يا مستكاية
عقبال يارب مليون سنة

جت متأخرة

سامحيني والله ما عرفت غير دلوقتي حالا من البوست دا

مستكه يقول...

رااااندا

متاخره ايه بس يا بنتي

وجودك بيسعدني جدا والله

وانتي طيبه يارب يا راندا

ربنا يسعد قلبك وتحققي كل اللي تتمنيه يارب